Deban ere kalera irten ziren herritarrak atzo, Emakumeen Nazioarteko Egunean. Aldarrikapen eta ospakizun ekitaldiak iragarriak zituzten Debako Udalak eta Sare Feministak, bereizita, eta irudi jendetsuak laga zituzten mobilizazioek.
Eguraldia lagun, eguerdian Udalak deitutako elkarretaratzea egin zen Foruen Plazan. 13:00etan, berriz, aurrez "beroketa kolektiboa" egin ondoren, Sare Feministak ekitaldia egin zuen plaza berean, Zapalkuntza sistemei sua. Beste mundu bat feminismotik leloa ardatz hartuta. Jarraian, Zea Maysen Elektrizitatea abestiaren kantaldi herrikoia izan zen Plaza Zaharrean, Iturrian taldearen eskutik, eta bigarren abesti bat ere eskaini zuten bertaratukoen gozamenerako. Eta, beranduago, poteo musikatuarekin, bazkari kolektibo autogestionatuarekin eta Arramazka musika taldearen kontzertuarekin borobildu zuten eguna.