Euskal Birusa elkarteak antolatutako ohiko baba-jana egin zuten atzo San Martin azokaren ostean, Merkatu Plazan. Guztira, 230 lagun inguru elkartu ziren herri-bazkarian, urriaren 20an salgai jarritako txartel guztiak ordu erdian agortu ostean. Babarrunak, postrea eta kafea dastatzeaz gain, bertaratutakoek Ermuan kantuan saioaren baitan Txerokiak taldearen musikarekin girotutako bazkariaz gozatu zuten.

San Martin Azokaren 36. edizioaren barruan, Euskal Birusa elkarteak antolatutako produktu-lehiaketako sariak banatu dituzte gaur eguerdian. Fruta eta ortuariak, gazta, ogia, euskal pastela, eztia, sagardoa eta txakolina izan dira epaimahaiak baloratutako produktuak.