Azken hilabeteetako jarduna amaitzeko, ospakizun berezi bat prestatu dute Arbil Elkarte Sozialeko ordezkariek. Ikasturte bukaerako jaia datorren ostegunean (ekainak 18) izango da, Kultur Elkartean, eta, iragarri dutenez, umorea, musika eta lagunarteko giroa izango dira nagusi.
11:00etan ekingo diote egitarauari, musika instrumentaleko emanaldi batekin. Musika Eskolako adin nagusiko ikasleak izango dira protagonistak, eta euren lana erakutsiko dute. Ondoren, Edurne Agirrezabala umoristak Ama baten bizipenak bakarrizketa egingo du.
Kantu herrikoiekin jarraituko du egitarauak; tartean, La bella Lola eta Xabier Leteren Habanera piezak abestuko dituzte guztiek batera. Eta, ospakizuna borobiltzeko, hamaiketakoa egingo dute.
Sasiolara irteera
Bihar (ekainak 13), gainera, San Antonio eguna ospatuko dute Sasiolako baselizan. Urteroko ohiturari jarraituz, bertara oinez joateko ibilaldia antolatu dute. Nolanahi ere, nahiago dutenek autobus zerbitzu berezia ere izango dute eskura.
Oinezkoak 10:30ean abiatuko dira, estalitako pasealekutik. Autobusean joatea aukeratzen dutenak, aldiz, 11:00etan aterako dira, geralekutik. Iragarri dutenez, festa amaitutakoan, 13:00etan izango da itzulerako autobusa.
Sasiolara iritsitakoan –11:30 aldera– elizkizun berezia egingo dute, eta, amaitzeko, salda eta txorizoa emango dizkiete bertaratutako guztiei.