Oraindik ez dute aurtengo Euskal Jaiko egitarau osoa iragarri, baina berritasunik ere izango da tartean, Zuhatza-Kolore Anitz Aisialdi Taldeak pintxo lehiaketa antolatu baitu ospakizunera begira. Irailaren 26an egingo da ekimena; 10:30erako jarri dute hitzordua, zumardiko kioskoan.
Antolatzaileek azaldu dutenez, 6-8 laguneko taldeak izango dira lehian. Ekimena HH5 eta LH6 bitarteko haurrei zuzenduta dago; zehaztu dute, hori bai, HH5 eta LH 1-2 mailetako ikasleek gurasoren baten edo biren laguntzaz parte hartu beharko dutela.
Izena emateko epea bihar, hilak 18, itxiko dute. Lehiaketan parte hartu nahi dutenek posta elektronikoz egin beharko dute izen-ematea, koloreanitz@gmail.com helbidera mezua idatzita; taldearen eta taldekideen izenak zehaztu beharko dituzte mezuan. Halaber, alergiarik izanez gero, aurrez jakinaraztea komeni dela gogorarazi dute aisialdi taldeko kideek.
Lehiaketa hasi eta ordubete beranduago, 11:30ean, Haur Hezkuntzako ikasleei zuzendutako mural margoketa ere egingo dute.