"Gure etxeak leku segurua izan behar du, baina jabetzen al gara bertan egon daitezkeen arriskuez?". Bada, galdera hori abiapuntu hartuta, etxeko istripuen prebentzioari buruzko hitzaldia egingo du bihar Gurutze Gorriak, herritar guztiei zuzenduta, "etxe seguruagoak izaten laguntzeko helburuarekin".
Debako Arbil Elkarte Sozialaren ekimenez egingo da saioa eta, aurreratu dutenez, arriskuak identifikatzeko eta saihesteko aholku praktikoak nahiz prebentzio-neurri errazak landuko dituzte bertan. 11:00etarako jarri dute ordua, Arbil elkartean, eta ordu eta erdi iraungo du hizketaldiak.