Egitarau betea prestatu du Arbilek datozen asteotarako. Izan ere, aurrez iragarriak zituen, besteak beste, sakelakoa erabiltzen ikasteko tailerra –hilaren 10ean, 17an eta 24an–, aurretiazko borondateen gaineko informazio-hitzaldia –azaroaren 13an eta 27an– nahiz Burgosera irteera –hilaren 19an–, eta zerrenda horri mindfulness-ari buruzko tailerra eta oinarrizko informatikan trebatzeko ikastaroa gehitu dizkio orain.
Ikigai zentroan egingo dute lehenbizikoa, Eneko Cabelloren gidaritzapean. Bost saio izango ditu mindfulness ikastaroak: azaroaren 23an eta 27an eta abenduaren 7an, 11n eta 21ean, 12:00etatik 13:00etara bitartean. Eta, aurreratu dutenez, baliteke ekimenak jarraipena izatea 2027. urtean. Parte hartu nahi dutenek Arbil elkartean egin dezakete izen-ematea, 10 euroan –astelehenetan nahiz asteazkenetan, 11:30etik 13:00etara–. Taldea osatzeko gutxienez zortzi lagun behar dira, eta gehienez, 15.
Prezio berean eskaini dute oinarrizko informatika ikastaroa. Hiru saio egingo dituzte, Arbil elkartean: azaroaren 26an, eta abenduaren 3an eta 10ean, 17:30etik 19:00etara. Zabalik dago izen-ematea, ohiko ordutegian.