Gaur ekingo diete Santa Zezilia Eguna ospatzeko emanaldiei

Izaro Aulestiarte Lete

Igandean (azaroak 22) izango da Santa Zezilia Eguna da, musikarien zaindariaren eguna; ohi bezala, herriko musikariek emanaldiak antolatu dituzte. 

Herriko musika taldeak gaur (azaroak 19) hasiko dira musikarien zaindariaren eguna ospatzeko kultur ekitaldiekin. Debako Udal Musika eta Dantza Eskolako ikasleek, adibidez, kalejira egingo dute 16:30ean, baita merienda ere, ondoren, musika eskolan.

Gainontzeko emanaldiak, dena den, astebururako iragarri dituzte. Larunbatean (azaroak 21) eskaintza bikoitza izango da aukeran, herritarren gozamenerako: batetik, 12:30ean, Debako Musika Bandaren urteroko kontzertua hartuko du Santa Maria elizako klaustroak –ohi legez, aurrez herrian ibiliko dira musikariak, kalejira txiki bat egingo baitute, giroa berotze aldera–; bestetik, Kalean Kantuz taldeko kideak iluntzean irtengo dira kalera, 19:30ean.

Igandean, gehiago

Igandean (azaroak 22), aldiz, goiz-eguerdi partean egingo dituzte Santa Zezilia ospatzeko ekitaldiak. Hasteko, txistu doinuak eta Banda Gaztea izango dira protagonistak, 11:00 aldera kalejiran irteteko asmoa baitute, eta, ondoren, Aitzuri Abesbatzaren txanda izango da; kalerik kale ariko da eguerdian.