Eguerditik goizaldera arte iraungo duen ekintza-sortarekin dator urteurreneko ospakizun nagusia. Eta, asanbladako lehengo eta egungo kideei ez ezik, gainontzeko herritarrei ere egin diete festara batzeko gonbidapena.
Hasteko, 13:00etan karro-poteoa izango da eta 15:30ean herri bazkaria egingo dute gaztetxean. Gazte Asanbladako kideek jakinarazi dutenez, hamarnaka lagun batuko dira otordura.
Bazkalostea girotzeko, halaber, bingo musikatua antolatu dute, eta 19:00etan Latuna Bando Txaranga irtengo da kalera. Gau partean, berriz, musika izango da nagusi gaztetxean: 22:00etan Zerotan taldearen erromeria izango da, gauerdian Txamakos taldea igoko da agertokira eta, amaitzeko, 02:00etan DJ Erratza arduratuko da musika jartzeaz. Tonbola ere izango da gau osoan.
Azken ekintzak, gaur zortzi
Gorrotoz suntsitu, ilusioz eraiki! lelopean ondutako egitaraua azaroaren 27an itxiko dute. 17:00etan hasita, haurrei eta familiei zuzendutako txotxongilo tailerra, ipuin kontaketa eta txokolate-jana egingo dituzte gaztetxean.