Begirada guztiak San Bartolome kalean jarrita daude aurreko barixakuan Kalegoen plazako 4. atariko etxearen atzealdea jausi zenetik. Astelehen iluntzean bilera egin zuen Udalak kaltetuekin, ordura arteko lanen berri eman eta hurrengo pausoak zeintzuk izango ziren zehazteko. Bileran argitu zuten gutxienez bi astetan ezingo direla bizilagunak euren etxeetara itzuli, eta etxepe horietako negozioak itxita egongo direla. Ezbeharraren lekukoen eta kaltetuen testigantzak batu ditu BARRENek.