Hirugarren Dan maila eskuratzeko azterketa buru-belarri prestatzen aritu ondoren, gerriko beltzaren titulu berria bereganatzea lortu du Deban bizi den Jon Montiel (Eibar, 1986) judokak. Ekiberri Judo Klubeko arduradunak eta irakasleak abenduaren 20an egin zuen Euskadiko Judo eta Kirol Elkartuen Federazioak antolatutako Dan Graduko azterketa; urtebetez prestatzen aritu ondoren, lehenengo saiakeran gainditu zuen proba.
Azterketa Donostiako arte martzialen zentroan izan zen, eta bertan eskakizun tekniko handiko probak gainditu behar izan zituen federazioko epaimahaiaren aurrean; ondo defendatu zuen aurrez ezarritako programa, eta maila ona erakutsi: "Ondo prestatuta joan nintzen; ez nuen arazorik izan".
Azterketan Hegoi Esteban Eibarko Kalamua Judo Klubeko entrenatzailea izan zuen alboan, eta azaldu du tribunalaren aurrean egin behar izan zituen lurreko, zutikako eta katako ariketetan hura izan zuela laguntzaile. "Alde teorikoan oinarriak azaltzeko eskatu zidaten. Praktikoan, berriz, lur gaineko eta zutikako mugimendu bereziak garatzeko eta horien konbinazioak lantzeko eskatzen dizute. Zutik, esate baterako, osoto gari bat egin nuen".
Hurrengo maila
Titulu berria eskuetan, judokak iragarri du hurrengo helburua laugarren maila prestatzen hastea dela. "Judoan jarraitzen badut, hori izango da helburua. Gutxienez, 2028ra arte itxaron behar dut hurrengo azterketa egiteko aukera izateko".
Bien bitartean, azterketa prestatzen hasiko da. "Hego Estebanek maila bereko azterketa egingo du laster. Askotariko ariketak egin behar ditugu; nik uste dut lagungarri izango dudala lan hori guztiori".