Euskara gara lelopean abian da 24. Korrika. Bihar arratsaldean Zumaiatik iritsiko da lasterketa herrikoia Itziarrera, 18:08 inguruan, eta Deba zeharkatu ondoren hartuko du Mutrikurako bidea, 19:30 aldera.
Lehenago, ordea, Korrika Txikia egingo dute ikasleek. Deban, Luzaro ikastetxeko haurrek (2 urtekoek izan ezik) 15:00etan jarrita dute hitzordua, portuan; 6. mailakoak hasiko dira han, eta bidean, gainontzeko mailetako ikasleak batzen joango dira, adinaren arabera. Ibilbidea honakoa izango da: portutik Ondargain tabernara, handik Labar tabernara, ondoren Gurutze Gorrira, gero La Caixatik herrira sartuko da lasterketa eta Plaza Zaharretik eta Foruen Plazatik pasako dira parte-hartzaileak. Foruen Plazan bukatuko da ekimena; bertan egingo dute ekitaldi nagusia eta, ondoren, txokolate-jana izango da Zubi Guraso Elkartearen eskutik.
Itziarren, berriz, 15:15ean ekingo diote Korrika Txikiari. Itziarko Eskolak eta Lizarbe Guraso Elkarteak Bikain parean elkartzeko dei egin diete herritarrei. Ondoren, herrigunean ibiliko dira euskararen aldeko lasterketan.