Apirilaren 16an, Batzar Nagusietako Jasangarritasun Batzordean izango dira Eibarko Mendiak Bizirik taldeko ordezkariak. Esan dutenez, Basalgo zentral eolikoaren proiektuaren baitan aurreikusitako “sei makro-aerosorgailuak jartzeak Debabarreneko eta Debagoieneko bost udalerriri eragingo lizkiekeen kalte ugariak” mahai gaineratuko dituzte foru ordezkarien aurrean.
Honako kalteak nabarmendu dituzte: “Mendian tamaina handiko errepideak eraikitzea parke eolikoa instalatzeko behar den materiala garraiatzeko, haize-errota bakoitzeko hormigoizko plataforma erraldoiak, erauzitako 13.000 zuhaitz, landa-lurren, basoen eta mendien industrializazioa, hegazti mehatxatuen habitataren gaineko eraginak, kultura-ondareari kalteak, paisaiaren gaineko eraginak…”
Halaber, gogora ekarri dute 6.200 pertsonak sinatu dituztela proiektuaren kontrako alegazioak.