Deban, ohiko egitarauari eutsiko zaio neurri handi batean. Jai giroa 21:00etan hasiko da, Kalez Kale txistulari taldearen kalejirarekin. Ondoren, 22:00etan, Foruen plazan, San Joan sua piztuko dute, baina aurten tamaina txikiagokoa izango da. Ohikoa den bezala, Gure Kai euskal dantzari taldeko kideek suaren inguruko dantzak eskainiko dituzte. Jaiak Ostolaza eta Narbaiza trikitilarien erromeriarekin jarraituko du.
Itziarren, berriz, Eusko Jaurlaritzak egindako gomendioei jarraituz, bertan behera utzi dituzte San Joan bezperarako aurreikusitako ekitaldi guztiak. Era berean, ekainaren 24an Santa Katalina baselizan urtero egiten den meza berezia ere bertan behera geratu da.