Otsailaren 5ean, XV. Ikasenpresa Azokan Euskadiko Lanbide Heziketako 61 ikastetxetako (31 publiko eta 30 itundu) 3.000 ikasle baino gehiagok hartuko dute parte. Ikasturtean zehar, 190 irakasleren laguntzarekin, 622 proiektu ekintzaile garatu dituzte, eta horiek guztiak herritarren aurrean aurkeztuko dituzte
Benetako produktu eta zerbitzuak
Ikasenpresa Eusko Jaurlaritzako Hezkuntza Sailak bultzatutako programa da, Lanbide Heziketan kultura ekintzailea sustatzea helburu duena: "erronketan oinarritutako ikaskuntza kolaboratiboaren bidez, ikasleek beren ideiak ingurune praktiko eta errealista batean kudeatzen dituzte"
Hezkuntzaren ikuspegitik egitasmoa "enpresa-simulazio bat" bada ere, azokan erakutsiko diren produktu eta zerbitzuak "benetakoak" dira
Eibarko Udalak eta Eusko Jaurlaritzako Hezkuntza Sailak azpimarratu dutenez, azoka hau prestakuntza prozesuaren "unerik gorena" da, non ikasleek ingurune praktiko eta errealista batean erakutsi dezaketen beren balioa.
Karpa tematikoak eta gune berriak
Aurtengo edizioak berrikuntza garrantzitsuak dakarzka antolakuntzan. Azoka hiriko hiru gunetan banatuko da: Unzaga, Txaltxa-Zelai eta Errebal Plazia. Bertan, lau karpa tematiko egokituko dira proiektuak eremu profesionalaren arabera sailkatzeko: Industria eta fabrikazio aurreratua, Digitalizazioa eta konektibitatea, Merkataritza eta mugikortasuna, Ongizatea.