Gaur goizean, goizeko zortziretatik bederatzietara bitartean, Saka ganadutegiko zezenak askatu dituzte Eibarko Untzaga plazan, zehazki, bost bigantza eta idixko bat. Ekitaldira jende asko batu da, bai hesiaren atzera eta baita plazaren barrura ere. Barruan, batez ere, gazteak izan dira, zezenen aurrean errekorteak egiten ahalegindu direnak. Datozen egunetan, beste bi aldiz aterako dituzte zezenak Eibarren, 24an eta 25ean. Argazkiak: M. Unamuno.
Zortzi urteren ostean bueltatu dira zezenak Eibarko San Juan jaietara. Udal Gobernuaren erabakiak, aldeko eta kontrako iritziak eragin ditu herritarren artean, horren adibide, gaur goizean, zenbait herritarrek euren kontrakotasuna adierazi dute plazan, Sokamuturra Ez taldeak deituta.