Bost elgoibartarrek amaitu dute Zegama-Aizkorri maratoia

 Antxintxikarien ahala muturreraino eramaten duen proba izan arren, lagun mordoak parte hartu nahi izaten du urtero Zegama Aizkorri maratoian. Antolatzaileek, baina, 400 lagunetan ezarri dute parte hartzaileen muga. Proba gogorreko lehen oztopoa zozketan aukeratua izatea da, hortaz. Sei elgoibartarrek gainditu zuten zoriak ezarritako lehen galbahea eta Zegamako irteeran egon ziren domeka honetan. Unai Narbaizak hanketako minez bertan behera utzi behar izan zuen lehia, baina gainerakoek postu onak lortu dituzte. Denbora guztian lainopean aritu ziren arren, marka onak egin zituzten, gainera, elgoibartarrek. Mendaron bizi den Jon Revert elgoibartarrak, esaterako, 2007ko ekitaldian ezarri zuen bere markarik onena hobetu zuen, 11 minutuan hobetu ere. Ikus beheko taulan elgoibartarren sailkapena.

Postua	Izena	Denbora	Erritmoa
51	Jon Revert	04:48:15	6:50
52	David Conde	04:48:17	6:50
88	Xabier Bergaretxe	05:01:15	7:08
215	Iñigo Lariz	05:52:16	8:21
230	Josu Mendicute	05:54:17	8:24

 • Ingeles bat eta italiar bat bizkorrenak

 Sailkapen nagusiari dagokionez, Ricky Lightfoot –hanka arin moduan itzul daiteke bere abizena- ingelesak irabazi zuen lasterketa, 04:03:12 denbora eginez. Nesketan, berriz, Emanuela Brizio italiarrak 04:38:19 denbora egin zuen eta beraz, errekorra hautsi. 345 gizonezko eta 35 emakumezko izan zirela guztira, eta azpimarratzekoa da Oihana Kortazar elgetarrak, 2008ko Karakateko Igoerako irabazleak eta errekorraren jabeak, 7. postuan amaitu zuela lasterketa.
           Ikus hemen: Sailkapen osoa (pdf)

 

∞Lotura duten albisteak:

• Urbia hunkigarria (urgazi.com)