Altzolako tren geltokia mantentzearen alde diharduen Tren Geltokia Bai plataformakoek Altzolan duen lokalean jasoko dute Kubara bidaltzeko materiala, zapatuan, 11:00etatik 14:00etara bitartean. Karmen plazan dute lokala.
Hona hemen ekimenaren sustatzaileek biltzeko eskatu duten materiala:
- MATERIAL SANITARIOA: 2027ko ekainetik aurrera iraungitzen diren medikamentuak, mota guztietako produktu sanitarioak, ekipo medikuak, tresneria kirurgikoak (pintzak, guraizeak, bisturiak, hariak…), eskularruak, preserbatiboak.
- ELIKADURA-OSAGARRIAK: Bitaminak, multibitaminak, mineralak (magnesioa, burdina, kaltzioa), Omega 3 eta probiotikoak.
- ELIKAGAI EZ GALKORRAK: Janari enlatatua, arroza, zerealak, lekaleak, pasta, esne-hautsa, olioa, tomatea briketan. 2027ko urtarriletik aurrera iraungitzen direnak.
- HIGIENE MATERIALA: Konpresak, tampaxak, toallatxoak, pixoihalak.
- KIROL MATERIALA: Baloiak, pilotak, erraketak, bizikletak eta ekipamendua (kamisetak, takodun botak…).
- IKAS MATERIALA: Arkatzak, boligrafoak, koloretako pinturak, zorroztekoak, koadernoak… (Testu-liburu eta entziklopediarik ez).
- GARBIKETA MATERIALA: Erratzak, fregonak, oihalak, espartzuak eta biberoi garbitzaileak.
Blokeo inperialistaren aurrean, Kubarekin elkartasuna
Kubara eramateko oinarrizko produktuak biltzen ari dira azken egunetan Euskal Herriko Kontseilu Sozialista (EHKS) eta Ikasle Antolakunde Sozialista (IAS), Euskadi-Cuba elkartearen eskutik. Aipatutako hiru antolakundeek apirilaren 7an eman zuten elkartasun-ekimenaren berri. Kubako Iraultzaz geroztik AEBek "Kubaren aurka izan duten politika isolazionista eta kriminala" salatu zuten, Kubako egoera larria horren ondorio dela gogoraraziz, eta ohartarazi zuten Donald Trumpen agintaldietan larriagotu dela blokeo-erregimen hori. Seinalatu zuten, gainera, esku-hartze militar baterako arriskua oso bizia dela gaur egun.
Antolatzaileek eta ekimenarekin bat egin duten boluntarioek 93 herritan jarriko dituzte bilkera puntuak apirilaren 25ean, honako hauetan:
Diru bilketa Habanako ospitale batentzat
Hortaz gain, Euskal Herria-Kuba herri ekimenak eta Euskadi-Kuba elkarteak diru bilketa berezia abiatu dute, eta hilabete bakarrean 180.000 euro biltzea lortu dute euskal kulturako 130 erreferenteren babesari esker. Euskal elkartasuna aktibatzeko “Argia eta indarra Kubarentzat” lelopean, diru-bilketa kanpaina ere egiten ari dira herriz herri. Dirua Habanako William Soler Unibertsitate Ospitale Pediatrikoko Poliklinikoari autonomia elektrikoa emateko erabiliko da, eguzki-energia fotovoltaikoko instalazio oso bat erosiz eta bertara bidaliz.
Kanpainaren eramaileek argitu dutenez, kanpainak lortu duen arrakasta ikusita, bigarren eguzki-panel baten instalazioa lortzeko kanpainaren helburua 244.000 eurotara emendatu dute. Proiektua mediCuba-Europa GGKEak kudeatuko du. Herritarrek diruz lagundu nahi izanez gero, Laboral Kutxako kontu korronte baten bidez (ES35 3035 0134 43 1340 0592 71) edo Bizum bidez (04713 kodea erabiliz) egin ditzakete ekarpenak.