San Roke eguna abuztuaren 16an bada ere, azken urteotan uztaileko azken asteburuan ospatzen dituzte Azkue auzoan San Roke jaiak. Opor sasoia izan ohi da abuztua Elgoibarren, eta bai herritarrentzat baita antolatzaileentzat ere uztaila amaiera data hobea zelakoan hartu zuten jaiak dataz aldatzeko erabakia. Hortaz, barikutik domekara bitartean ospatu dituzte Azkueko jaiak.
Ume zein helduentzako ekintzak antolatu dituzte, eta giro polita izan da San Roke ermita inguruko berdegunean.
Jaiaz gain, bolo txapelketa ere jokatu dute, eta Leire Uranga eibartarrak irabazi zuen. Bonik egin zuen bigarren, eta Urtzi Oyarbide izan zen hirugarrena.
ERRIFAREN ZOZKETA
Errifako zenbaki sarituen berri ere eman dute arduradunek:
1. saria, produktuz beteriko orgatila: 0610 (Erreserba, 1066)
2. saria, telebista: 0967 (Erreserba: 1880)
SAN ROKE EGUNA
Abuztuaren 16an, San Roke egunean, meza egongo da ermitan, eta ondoren salda eta txorizoa banatuko dituzte.
Argazkiak: Mikel Askasibar