XI. Sagardo Egunaren giroa pizten hasteko, karropoteotxoa antolatu dute gaur iluntzean Ermuko Gazte Asanbladak, Nushu Gazte Feministek eta Ermuko Ernaik. 19:30ean ekingo diote eta bilbidea honakoa izango da: Hanigan's - Karikato/Amatxi - Sagarra - Rincón - DQ - Zabal - Infreñu. Biharko, egun osorako programazioa dago prestatuta:
2025eko Euskaraldiko Ermuko Hamaikakoaren aurkezpenarekin hasiko da eguna, eguerdiko 12etan, plazan (albistea hemen). Segidan, txosnak irekiko dituzte, Txotx!-aren lehen txandari ekinez. Pintxoa eta sagardoak dastatzeko edalontzia erosteak 7 euroko kostua izango du, eta antolakuntzatik "dirua justu" eramateko deia egin dute. 14:30ean bazkaltzeko tartetxoa hartuko dute eta 17:30ean 'kupelak' zabalduko dituzte berriz. Beste bi ordu iraungo ditu Txotx!-aren bigarren txanda honek eta 19:30ean karropoteoari ekingo diote zuzenean plazatik. Gauean, plaza dantzan jarriko dute Ermuko Begibide erromeriak, eta Aduna, Alegia, Zizurkil eta Tolosatik etorriko diren Arrixku taldeko lagunek, 22:00etan hasita.
