Atzo, 05:40an, Ermuko Udaltzaingora jo zuen barruko arropetan zegoen 22 urteko gazte batek. Kontatu zuenez, gauean zehar, tabernetan, istiluak sortu ziren gazte talde baten eta bere lagunaren artean, eta bera tartean sartu zen erasoa eragozteko. Gerora, berriz ere topo egitean, eraso egin zioten, eta etxera zihoala, lau lagunen artean biluztu eta lapurreta egin zioten.
Udaltzainak Eibarko Ertzaintzarekin jarri ziren harremanetan, eta Ermuko tren geltokian atxilotu zuten erasotzaileetako bat, gainean biktimaren mugikorra zeramala. Gainerakoak Durangora zihoan trenean identifikatu zituzten ertzainek.
Ustezko erasotzaileak 18 eta 22 urte arteko gazteak ziren, eta atxilotuta geratu ziren epailearen aurrera eraman bitartean. Biktima Mendaroko ospitalera eraman zuten, izandako lesioak artatzera.