Ezekiel Etxebarria Saria Ermuko Udaleko Euskara Sailak bultzatutako ekimena da, baina irabazlea herriko irakurleen hautuan soilik oinarrituta erabakitzen da: aurreko urtean Udal Liburutegian gehien mailegatutako euskarazko liburuaren egilea saritzen da.
XIX. mendean bizi izan zen Ezekiel Etxebarria Ermuko apaiz eta idazle euskaltzalearen omenez izendatu zuten saria, 1996an haren bertso eta lanak abade-etxean topatu ondoren. Gerora, sona handiko hainbat idazlek jaso dute haren izena zeraman garaikurra –Jon Maia, Karmele Jaio, Kirmen Uribe... eta Joseba Sarrionandia, iaz–. XVIII. aldia ospatzen da aurten, eta 2025ean mailegatutako liburuen erregistroek garbi utzi dute: Miren Amuriza Plaza idazle eta bertsolari berriztarraren bigarren nobelak –Pleibak– izan du ermuarren artean arrakastarik handiena.
Ekitaldia, datorren astean
Sariaren helburua ez da egilea omentzea soilik, baita irakurleen eta idazleen arteko lotura indartzea ere. Horregatik, liburu irabazlearen egilea herrira gonbidatzen dute, eta, garaikurra emateaz gain, solasaldi irekia egiten da. Ekitaldia maiatzaren 13an izango da, datorren eguaztenean, 19:00etan, Kaltxango AEK euskaltegian. Bertan izango da Miren Amuriza bera, eta Pleibak lanaren inguruan solasean aritzeko aukera izango dute batzen diren herritar guztiek.
Segidan azken hamar urteetako obra irakurrienak eta berauen egileak:
| URTEA | LIBURUA | EGILEA |
|---|---|---|
| 2024 | Markos Gimenoren 101 letrakartel | Joseba Sarrionandia |
| 2023 | Ostegunak | Jon Arretxe |
| 2022 | Sumendiaren estrategia | Fernando Morillo |
| 2021 | Superpatata | Artur Laperla, Esther López Epeldek itzulia. |
| 2020 | Miñan | Amets Arzallus eta Ibrahima Balde |
| 2029 | Indiara Bidaia | Marc Armspach "Marko" |
| 2018 | Musika Airean | Karmele Jaio (2. aldiz saritua) |
| 2017 | Jara | Jasone Osoro |
| 2016 | Arotzaren eskuak | Alberto Ladron Arana |
| 2015 | Koaderno Handia | Agota Kristol, Eskarne Mujikak itzulia. |
Horiez gain, Ezekiel Etxebarria saria jaso duten egileen artean daude Kirmen Uribe, Katixa Agirre, Irati Jimenez, Antton Irusta eta Jon Maia.
