Paella lehiaketara batu diren txaranga guztiek arroz-paketeak eta Ermuko Merkatari eta Ostalarien Elkartearen mantalak jaso dituzte opari, izena ematearren soilik. Epaimahaia osatu dute Beatriz Gamiz alkateak, Udala ordezkatuz; Quetzal dendako Montse Gonzalezek, EMOEren izenean; eta Mallabiko Trabakua Behekoa jatetxeko Christian Mendez sukaldariak, Lobiano Gastronomia Elkartearen ordezkari gisa.
Paellak 14:00etatik 15:00etara bitartean aurkeztu behar ziren, eta azkenean hemeretzi txarangak eraman dituzte beren proposamenak plazako kioskora, epaimahaiak dastatu eta balora zitzan.
Arratsaldean sari-banaketa
Epaimahaikideek azaldu dutenez, paellen aurkezpena, arrozaren egosketa-puntua, testura eta zaporea izan dituzte kontuan. Irabazleak 19:00etan emango dira ezagutzera, 19:00etan, Orbe Kardinala plazako aterpean. Lehen sailkatuak 500 euroko saria eta garaikurra jasoko ditu; bigarrenak, berriz, 200 euro eta garaikurra.