Ermuko Bizikletaren Festak haur eta familia ugari bildu zituen atzo goizean San Pelaio plazan. Eguraldi ona lagun, bizikletaren inguruko hainbat jardueraz gozatzeko aukera izan zuten herritarrek, eta antolatzaileek azaldu dutenez, iaz baino parte-hartze handiagoa izan da.
Jardunaldia 10:30ean hasi zen, bizikletak konpontzeko tailerrarekin. 11:00etan, berriz, haurrentzako bizikleta-ginkana egin zuten. Jarduera hasi ahala haur gehiago batu ziren, eta guztira 35-40 haur inguruk hartu zuten parte. Ermuko Txirrindulari Elkarteko taldeak ere ia osorik parte hartu zuen goizeko ekintzetan.
Bizikletaz herrian barrena
Egitarauaren barruan, ibilaldi zikloturista ere egin zuten herriko kaleetan zehar. Antolatzaileen arabera, giro ona izan zen nagusi goizean zehar, eta parte-hartzaileek bizikletaz gozatzeko aukera izan zuten.
Bestalde, Ermuko Txirrindulari Elkarteak azaldu duenez, Bizikletaren Festa auto klasikoen kontzentrazioarekin batera egin da aurten ere. Elkartearen ustez, bi jarduerak ez dira erraz bateratzen, eta horregatik, datozen edizioei begira, Europako Mugikortasun Astea baliatuz, herriko kaleak bizikletentzat hartzea eta festa herri osoan zehar zabaltzea planteatzen dute.
Bizikletaren Festarekin batera, Ermuko Txirrindulari Elkarteak beste jarduera batzuk ere egingo ditu datozen egunetan. Ermuko ikastetxeetara joango dira bizikleta-ginkanak egitera, eta haurrei zirkulazio-arauak eta bizikletaren gaineko trebetasunak lantzeko aukera emango diete.
Bideoan ikusgai ginkana eta ibilaldi zikloturistaren irteera: