Lauko Errotabarriko neskek estreinaldi bikaina egin dute Urrezko Ohorezko Mailan. Lehen jardunaldian bakarrik galdu zuten, gol bakarreko aldearekin. Ostean, lau neurketa irabazi zituzten jarraian, seigarren jardunaldian berdindu egin zuten, eta joan den asteburuan beste garaipen bat eskuratu zuten, etxean, Leongo Caja Rural Clebaren aurka (32-21). Emaitza horri esker, gainera, sailkapeneko bigarren postuan kokatu dira.
Ermua CDko mutilek, berriz, ez dute lehiarik galdu eta lehen postuan daude sailkapenean, berdinketa batekin eta zazpi garaipenekin. Teodoro Zuazuan jokatutako azken partidan, gainera, nagusitasunez gailendu ziren: aurkariek bi gol baino ez zituzten egin; ermuarrek, aldiz, zortzi sartu zituzten (8-2), Markel Blancoren hat trick-arekin.
Golegile nagusiak
Hala ere, partidako lehen bi golak egin zituen Iker Grande da orain arteko goleatzaile nagusia, bai taldean, bai ligan, zortzi partidatan bederatzi gol sartuta. Errotabarriren kasuan, Nahia Legorburu da taldeko golegile nagusia: zazpi partidatan 27 gol batu ditu.
Nahia Legorburu Goñi, Ermuko kiroldegian jokatutako azken partidan. @dialektikapsico
Asteburuko hitzorduak
Gaur, zapatua, San Martin Eguna galduko dute Errotabarriko neskek, baina, horren ordez, asteburu-pasa egingo dute Kanariar uharteetan. Cicar Lanzarote Ciudad de Arrecife taldearen kontra lehiatuko dira Las Palmasen, 20:30ean, Titerroy pabilioian. Ermua CDko mutilak, berriz, domekan lehiatuko dira, Bilboko Aitxarte futbol zelaian, eta Loiola Indautxu taldearen kontra neurtuko dituzte indarrak.