Erdi Arora bidaiatzeko aukera izango da Ermuan asteburu osoan

Garazi Mendieta

Artisautza, gastronomia, musika eta ikuskizunak izango dira ostiraletik igandera Orbe Kardinala plazan egingo duten azokan.

Erdi Aroko giroa nagusituko da asteburu honetan Ermuan, artisautza, gastronomia, musika eta ikuskizunak uztartuz. Hiru egunetan zehar, hainbat pertsonaia, kale-antzerki, ipuin-kontalari eta ikuskizun izango dira, adin guztietako bisitarientzat.

Azoka bihar 17:00etan irekiko dute, eta inaugurazio ofiziala 18:00etan egingo dute. Arratsaldean zehar, hainbat ikuskizunek girotuko dituzte kaleak; besteak beste, Madame Toilette, Fausto Fauno, Bufoia eta Torquemada printzesa izango dira. Demoniun emanaldiarekin amaituko dute azokako lehen eguna, 21:45ean.

Hiru eguneko egitaraua 

Larunbatean eta igandean goizez zein arratsaldez egongo da zabalik azoka. Goizeko jarduerak 11:00etan hasiko dira, eta 14:30ean egingo dute bazkaltzeko etenaldia. Arratsaldean, 17:00etan irekiko dituzte berriro postuak. Bi egun horietan, Erdi Aroko hainbat pertsonaia ibiliko dira plazan, baita ipuin-kontalariak ere.

Arratsaldeko egitarauan ere ez dira faltako kale-ikuskizunak. Larunbatean zein igandean 20:00etan egingo dute Herensugearen harrapaketa, eta ostiralean zein larunbatean, berriz, Sugarren xuxurla su eta aireko ikuskizuna eskainiko dute, 21:00etan.

Igandean, azokaren azken egunean, konpainia guztien desfile handia egingo dute, 20:45ean. Horrekin emango diete amaiera hiru egunez Ermuko erdigunea Erdi Aroko giroz beteko duten jarduerei.