Eguneroko zeregina zuen goizean-goiz esneak partitzera Ermura jaistearena, astotxoa bide-lagun. Ez zen ezkondu eta Victoria koinata, anai Joseren emaztea erditzean hil zenean, haien seme-alabez kargutu zen Anastasi. Mari Carmen jaioberriak aurrera egin zuen eta Ermuan hazi zuten, inude batekin. Izekok, anai-arrebak elkarren arteko harremana galdu ez zezaten, arratsaldero eramaten zituen baserrikoak Ermura, etxeko txikia ikustera. Aniñogoitxiko Ama Birjiñia deitzen zioten Ermuan. 1950ko apirilaren 20an zendu zen, jaiotetxean. Erretratua Durangon egin zuen, Germán Zorraquinen argazki-estudioan.