Erosketa hau mugarri historikoa da herriarentzat, zinema zaharra kultur ekipamendu berri eta moderno bilakatzea baitu helburu, herritarrek eta kultur eragileek urteetan zehar egindako eskaerari erantzunez.
Eusko Jaurlaritzaren ZAP funtsen dirulaguntzari esker, gainera, erosketa prozesua 38.000 euro baino ez zaio kostatu Debako Udalari. Zubeltzu 1.100.000 euroko balioarekin erosi du Udalak eta ZAP funtsek erosketaren kostu osoaren % 96,5 estaltzen dute. Lorpen hori gobernu-taldearen etengabeko lanaren isla da; izan ere, hasiera batean Debabarrenerako esleitutako ZAP funtsen banaketan Debak inbertsiorik ez zuen arren, gobernu taldearentzat lehentasunezkoa eta estrategikoa den proiektu hau gauzatzeko eta herritarrek hainbeste espero izan duten proiektua egiteko finantzaketa ziurtatzea lortu du udal gobernuak.
Debarako proiektu historikoa
Zubeltzu zinemaren erosketa Debako Udaleko gobernu-taldeak herritarren eskaera historiko honi erantzun eta debarrei kulturagune bat eskaintzeko egindako etengabeko lanaren emaitza da. Zubeltzu zinemak urteak zeramatzan itxita eta erabili gabe, eta orain, arte-, kultura- eta komunitate-jarduerak hartuko dituen funtzio anitzeko kulturgune bihurtu ahal izango da. Erosketa horrekin, udalerriak espazio maite bat berreskuratzeaz gain, urrats handia ematen du bere kultur-azpiegitura indartzeko bidean.
Debako alkateak, Alazne Txurrukak, proiektu hau "Debako kulturarentzat urrats historikoa" dela azpimarratu du. Zubeltzu zinema erosteak udalerriaren kultur-eskaintza zabaltzeko aukera emango du, eta gure herritarrei era guztietako jarduerak egiteko erreferentzia-gune bat eskainiko die. Proiektu honek ez dio kultur behar bati bakarrik erantzuten, baita gure herritarren eskaera historiko bati ere", gehitu du.
Kultur etorkizun oparoa Debarentzat
Zubeltzu zinemaren erosketa hasiera baino ez da. Urrats honekin, Debak kutur etorkizun dinamikoago eta guztiontzat eskuragarriago baterantz egiten du jauzi. Zubeltzu zinema erreferente bihurtuko da herriarentzat, Debako kultur nortasuna indartuko duten eta udalerriko bizitza soziala eta kulturala aberastuko duten jarduera sorta zabala hartuko duen gune gisa.
Gobernu taldeak udalerriko kultur garapenarekin duen konpromisoa berretsi du, eta Zubeltzu zinearen erosketarekin, Debak mugarri bat bete du herriko kultur eskaintzan. "Lanarekin eta dedikazioarekin, ia ezinezkoa zirudien erronka lortu dugula ikustea harro egoteko modukoa da", adierazi du Txurrukak. "Lorpen hau garaipena da debarrentzat, eta, azkenean, merezitako kultur espazio batez gozatu ahal izango dugu", amaitu du alkateak.