Debako Udalak hiri-mugikortasuna eta garraio publikoaren irisgarritasuna hobetzeko lanean jarraitzen du, Gudarien Plazan kokatutako autobus geltoki berriak martxan jarrita. Alazne Txurruka Debako alkateak eta Azahara Domínguez Mugikortasuneko, Turismoko eta Lurralde Antolaketako foru diputatuak azpiegitura berria bisitatu dute. Instalazio berri horri esker, zerbitzuaren erabiltzaileek gune erosoago, seguruago eta irisgarriagoa izango dute.
Jarduketari esker, bi autobus geltoki berri egokitu dira, noranzko bakoitzeko bana. Horrela, orain arte Gudarien Plaza inguruan sakabanatuta zeuden geltokiak puntu bakarrean zentralizatu dira, zerbitzuaren antolaketa hobetuz.
Geltoki berrietako bat Gudarien Plazan kokatu da, berriki berritutako eremuan, eta bertan aterpe berri bat jarri da Donostiarako noranzkoan doazen lineen erabiltzaileentzat. Bigarren geltokia, kontrako noranzkoan kokatua, Ondarroa eta Mallabiarako autobus-lineei zerbitzua emateko da, eta itxaron-gune babestua du Estalia Pasealekuaren inguruneak eskaintzen duen babesari esker.
Antolaketa berri honek garraio publikoaren erabiltzaileen esperientzia hobetzen du; izan ere, geltokiak errazago identifikatzeko aukera ematen du, ibilbideak sinplifikatzen ditu eta itxaronaldiko baldintzak hobetzen ditu, herritarrentzako gune erosoago eta irisgarriagoak eskainiz.
Debako konexioak hobetzen jarraitzeko elkarlana
Instalazio berriak bisitatu ondoren, Alazne Txurruka alkateak eta Azahara Dominguez diputatuak lan-bilera egin dute udalerriak gaur egun duen garraio publikoaren egoera aztertzeko, baita Debak lurraldeko beste gune batzuekin dituen konexioak indartzen jarraitzeko hobekuntza-ildo posibleak ere.
Bilera horretan, garraiobide desberdinen arteko koordinazioarekin, egungo zerbitzuen egokitzapenarekin eta herritarrek udalerrian planteatutako beharrei erantzuten jarraitzeko lanaren beharrarekin lotutako gaiak jorratu dira.
Debako Udalak Gipuzkoako Foru Aldundiari adierazi dio kalitatezko, eraginkorra eta herritarrengandik hurbil dagoen garraio publikoaren alde lanean jarraitzeko konpromisoa. Bestalde, Azahara Dominguezek Udalarekin elkarlanean jarraitzeko prestutasuna agertu du, udalerriaren mugikortasun-beharrak aztertu eta horiei erantzuteko.
Alazne Txurruka Debako alkateak adierazi duenez, “garraio publikoa hobetzea lehentasuna da Deba ondo konektatutako udalerria izaten jarraitzeko, pertsonek modu eroso eta seguruan mugitzeko aukera izan dezaten”.
Bestalde, Azahara Domínguezek nabarmendu duenez, “garrantzitsua da garraio publikoaren erabilera sustatzea, erabiltzaileei gune eroso, seguru eta irisgarriak eskainiz, eta obra hau horren adibide da. Gainera, autobus geltoki berri hauek Euskotrenekiko intermodalitatea erraztuko dute; hori funtsezkoa da Gipuzkoa bezalako lurralde batean, non MUGI sarea dugun eta, besteak beste, operadoreen arteko doako aldaketak eskaintzen dituen”.
“Gipuzkoan garraio publikoarekiko konfiantza maila oso altua izatea lortu dugu, baina ezin gara horrekin konformatu; gure erabiltzaileak eta gainerako erakundeak entzuten jarraitu behar dugu, elkarlanetik abiatuta erabakiak hartzeko eta eskaintzen dugun zerbitzua hobetzen jarraitzeko, erabilgarriagoa, erosoagoa eta egungo beharretara hobeto egokitua izan dadin”, azpimarratu du diputatuak.
Era berean, gogorarazi du legealdi honetan Debako Udalarekin lortutako elkarlanaren beste adibide bat dela hau. Elkarlan horren bidez hainbat neurri gauzatu dira, hala nola DB05 linearen ordutegi-egokitzapena Itziarko ikasleek etxera itzultzeko aukera izan zezaten, edo DB04 linean espedizio bat martxan jartzea desgaitasuna duten pertsona talde batek bere lantokietara iritsi ahal izateko.
“Etorkizunean ere elkarlanean jarraituko dugu, hori baita zerbitzua hobetzen eta gero eta erabilgarriago egiten jarraitzeko modua”, amaitu du.
Jarduketa honekin, Debak mugikortasun irisgarriago eta jasangarriago baten aldeko apustua indartzen du, garraio publikoarekin lotutako azpiegiturak hobetuz eta hobeto konektatutako udalerri baterantz aurrera eginez.