Debako Udalak amaitu ditu Artzabalgo bide publikoak hobetzeko lanak. Jarduketa N-634 errepidetik hilerri berriaren ingurura eta Sasiola aldera doazen bideetan egin da. Lanek aukera eman dute narriatutako tarteak berritzeko, zirkulazio-baldintzak hobetzeko eta oinezkoen zein ibilgailuen segurtasuna indartzeko.
Azken fasean, N-634 errepidetik hilerri berriaren ondoan dagoen azpiestazio elektrikora arteko tartea asfaltatu da, eta bertan seinaleztapen horizontala berritu da. Aurretik, berriz, Artzabalgo bideetako beste hainbat puntutan konponketa-lanak egin dira, hala nola pitzadurak, hondoratzeak eta zoladurako bestelako kalteak zituzten guneetan.
Era berean, hilerri berriaren inguruan bidea zabaldu egin da, ahal den neurrian, ibilgailuen arteko gurutzaketa errazteko eta zirkulazioa hobetzeko. Gainerako tarteetan, konponketa- eta egokitzapen-lanak egin dira, bideen erabilera-baldintza hobeak eta azpiegituren iraunkortasun handiagoa bermatzeko helburuarekin.
Jarduketa honekin, Debako Udalak udalerriko bide eta espazio publikoak pixkanaka hobetzeko lanean jarraitzen du, herritarren beharrei erantzunez eta gune horien erabilera-baldintzak hobetuz.