Datorren larunbatean, urriaren 24an, Deba txirrindularitzaren, naturaren eta familien topagune bihurtuko da II. Basotik Txirrindulari Festari esker. BSTK Basotik Fundazioak antolatutako ekimenak kirola, ongizatea eta basoen zaintza uztartuko ditu, eta herritar guztiak gonbidatu ditu egunaz gozatzera.
Jaialdiaren xehetasunak Debako Alamedan aurkeztu dituzte Alazne Txurruka Debako alkateak, Jon Ander Ostolaza BSTK Basotik Fundazioko zuzendariak, Amaikak Bat elkarteko eta OCETAko ordezkariek eta Aitor Galdos Euskadi Fundazioko zuzendari orokorrak. Guztiek nabarmendu dute Debako herritarren eta tokiko eragileen parte-hartzeak izango duen garrantzia, bereziki haur eta familien artean.
Txikienek ere beren lekua izango dute: 4 kilometroko ibilbidea eta ginkana
Eguneko hitzordu berezienetako bat Txirrindulari Txiki Festa izango da. Haurrek 4 kilometroko ibilbidea egiteko aukera izango dute, helduekin batera edo beren kabuz, eta bizikleta-ginkanan ere parte hartu ahal izango dute.
Parte hartzea doakoa da eta ez da aurrez izena eman behar. Parte hartu nahi duten haurrek eta familiek larunbatean, 10:45ean, Debako Alamedara hurbiltzea besterik ez dute izango. Bertan jasoko dituzte dortsala eta parte-hartzaileen opari-poltsa, eta 11:30ean abiatuko da familia-martxa.
BSTK Basotik Fundazioak dei berezia egin die Debako haurrei eta familiei bizikletak hartu eta festara animatzeko. Helburua ez da lehiatzea, baizik eta elkarrekin pedalei eragitea, ondo pasatzea eta kirolaren bidez naturarekiko harremana indartzea.
Zikloturista Martxako 450 plazak agortuta
II. Basotik Zikloturista Martxak harrera bikaina izan du aurten ere, eta 89 kilometroko ibilbidean parte hartzeko eskainitako 450 plazak agortu dira. Iazko 350 parte-hartzaileen kopurua handitu arren, herritarren erantzunak aurreikuspenak bete ditu, eta Debak txirrindularitza festa handia biziko du larunbatean.
Martxa goizeko 9:00etan abiatuko da Debako Foruen Plazatik (Udaletxe Plaza), eta txirrindulariak 12:30etik 13:00etara bitartean iritsiko dira Alamedako helmugara, kioskoaren ondora.
Martxan txirrindularitza profesionaleko ordezkari ezagunek ere parte hartuko dute, tartean Laboral Kutxa Teameko Irati Aranguren, Usoa Ostolaza eta Naia Amondarain, Euskaltel Euskadiko Mikel Bizkarra eta BBK Sub 23 taldeko Aimar Galdós.
Zozketa, parrillada eta giro herrikoia Alamedan
Bi martxak amaitutakoan, parte-hartzaileak eta herritarrak Alamedan elkartuko dira festari amaiera emateko. 13:00etatik 13:30era zozketa egingo da, eta bi bizikleta zozkatuko dira: errepideko bizikleta bat Zikloturista Martxako parte-hartzaileen artean eta mendiko bizikleta bat Txirrindulari Txiki Festako parte-hartzaileen artean.
Gainera, 13:00etatik 14:30era pintxoak eta parrillada izango dira parte-hartzaile guztientzat, Hazi/Baserria KM0ren laguntzarekin.
Larunbateko egitaraua
BASOTIK ZIKLOTURISTA MARTXA (89 km)
Irteera: Debako Foruen Plaza (Udaletxe Plaza). Helmuga: Debako Alameda (kioskoaren ondoan).
- 08:00–08:45: Dortsalen banaketa, Debako Foruen Plazan (Udaletxe Plaza).
- 09:00: Zikloturista Martxaren irteera, Foruen Plazatik.
- 12:30–13:00: Helmugara iristea eta finisher poltsen banaketa, Debako Alamedan (kioskoaren ondoan).
TXIRRINDULARI TXIKI FESTA (4 km)
Topagunea: Debako Alameda (kioskoaren ondoan).
- 10:45: Dortsalen eta parte-hartzaileen opari-poltsen banaketa.
- 11:30: Familia-martxaren irteera (4 km) eta bizikleta-ginkana.
AMAIERAKO FESTA – DEBAKO ALAMEDA
- 13:00–13:30: Bizikleten zozketa.
- 13:00–14:30: Pintxoak eta parrillada parte-hartzaile guztientzat.
Debarrei gonbidapena
BSTK Basotik Fundazioak Debako herritar guztiak animatu ditu larunbateko festan parte hartzera, bai bizikletaz, bai txirrindulariei animoak emanez eta Alamedako giroaz gozatuz.
Bereziki, herriko haurrei eta familiei luzatu die gonbidapena: bizikleta hartu, larunbatean 10:45ean Alamedara hurbildu eta 11:30eko martxan parte hartzea besterik ez dute egin behar. Ez da aurretiazko izen-ematerik behar!
II. Basotik Txirrindulari Festa BSTK Basotik Fundazioak antolatu du, Euskadi Fundazioa, Debako Udala, Gipuzkoako Txirrindularitza Federazioa, OCETA, Amaikak Bat eta Hazi/Baserria KM0ren laguntzarekin.
Informazio gehiago: www.basotik.eus