EAJ-PNV Soraluze kezkatuta agertu da maiatzaren 4ko Ogasun Batzordean aurkeztutako 2025ko aurrekontuaren exekuzioari eta soberakin ekonomikoari buruzko datuak ezagutu ondoren. Talde jeltzalearen ustez, zifrek adierazten dute EH Bilduren udal gobernuak “kudeaketa eskasa eta gauzatzeko gaitasun falta argia” erakutsi duela.
Batzorde horretan helarazitako datuen arabera, 2025ko udal aurrekontu orokorraren gauzatze-maila % 76an kokatu da, eta inbertsioen gauzatze-maila, berriz, % 44,71ra baino ez da iritsi. Gainera, 2025eko likidazioak 1.648.944 euroko gerakina utzi du, aurreko urtean baino ia 300.000 euro gehiago.
EAJ-PNVtik gogorarazi dute agintaldiaren hasieran EH Bilduko alkateak aurrekontu exekuzioaren % 90 gainditzea jarri zuela helburutzat, eta publikoki defendatu zuen ez zela normala urtea soberakin handiekin ixtea, horrek esan nahi zuelako aurreikusitako proiektuak ez zirela gauzatu.
Iker Aldazabal bozeramaile jeltzaleak adierazi duenez, “datu ekonomikoek erakusten dute, bigarren urtez jarraian, Udal Gobernuak ez dituela bete berak ezarritako helburuak. Horrek ondorio zuzenak ditu herritarrentzat, beharrezko proiektu asko gauzatu gabe daudelako oraindik, eta Soraluzek hobetzeko aukerak galtzen jarraitzen duelako ”.
EAJ-PNVk garatzeke edo garatu gabe jarraitzen duten proiektu batzuk zerrendatu ditu, besteak beste, Olaldeko hirigintza plana, Frontoi 5 udal eraikinaren irisgarritasuna bermatzeko arrapala, alde zaharreko oinezkoen gunea kudeatzeko sistema berria edo eraikin historikoetan informazio panelak berritzea.
Bestalde, nabarmentzekoa da Santa Ana – Andra Mari jaiei dagokien partidaren exekuzioak azken bi urteetan izan duen igoera nabarmena. Hasieran 76.000 €-ko aurrekontua aurreikusi bazen ere, 2024an 21.000€ gehiago gastatu ziren, hau da, % 27,6 gehiago. 2025ean, igoera are handiagoa izan zen, 30.000€-ra iritsiz, hau da, % 39,5eko igoera.
Aldazabalek adierazi duenez, “herritarrek proiektuak egia bihurtzea nahi dute, eta diru publikoa haien bizi-kalitatea hobetuko duten azpiegitura eta zerbitzuetara bideratzea. Horretarako gaude Udalean ”.
Azkenik, alderdi jeltzaleak azpimarratu du bere taldeak “urtez urte, ekarpenak eta proposamenak egiten dituela aurrekontu-proiektua aberasteko”. Hala ere, azpimarratu nahi izan du “onartutako aurrekontua gauzatzeko eta kudeatzeko ardura udal gobernu taldeari bakarrik dagokiola”.