Deitzaileek salatu dutenez, Israelek, Estatu Batuen laguntzarekin, Palestinako Herria akabatu eta inguruan izan ditzakeen babesekin amaitu nahi du. Une honetan Iran eta Libano eraso dute, lehen beste herrialde arabiarrekin egin duten bezala, otsailaren 28tik milaka pertsona erahilez. Libanoko egoeraren larritasuna nabarmentzekoa da; izan ere, Israelgo armadak herrialdearen hegoaldea okupatu eta suntsitu du, eta milioi bat pertsona baino gehiago kanporatu dituzte beren lurraldetik, Gazan azken 2 urte eta erdian zigorgabetasun osoz aplikatutako ereduari jarraituz.
Hain zuzen ere, Gazako genozidioaren aurrean nazioarteko komunitatearen pasibotasuna eta konplizitaeak eskuak libre utzi dizkio Israeli, palestinar herriaren sarraskiarekin jarraitzeko, herrialde berriak erasotzeko eta Palestinan, Libanon eta Sirian lurralde berriak anexionatzeko.
Horregatik, Ermua Palestinarekin ekimenak uste du funtsezkoa dela herritarrak kalera ateratzea, Euskal Herriko, Espainiako eta Europako erakundeei exijitzeko Israeli behingoz zigorrak ezartzea eta berarekin gaur egun oraindik mantentzen dituzten harreman ekonomiko, politiko, edo militar guztiak eten ditzatela. Halaber, armamentu-industriaren edo NATOren gisako aliantza militar inperialisten bidez gerretan duten inplikazioa amaitu behar dute. Beharrezkoa da egoera honetan mundu desmilitarizatu, zuzenago eta gerrarik gabeko baten aldeko apustu irmo eta garbia egitea.