Bereziki deigarria da elizaren eta eskuineko etxeen artean dagoen eraikina. Itxurrikua hiri-baserria da. XX. mendeko 60ko hamarkadara arte, oraindik ere bazen etxeren bat herriaren erdigunean, ganaduarekin eta ukuiluekin. Azkena Iturkaleko Iriondo Zesterokua familiarena izan zen; gutako askok gogoratzen dugu, elizaren aurretik pasatzen ziren behiak ere oroitzen ditugun bezala. Eta Itxurrikua bera ere azkenetakoa izan zen.
Irudian agertzen den Itxurrikua hiri-baserri zaharra egon zen leku berean, 1922an egin zuten eraikin bat dago gaur egun. 1921eko abenduan, hain justu, bere jabeak, Telesfora Ulaciak, Plaza Zaharreko 5. zenbakian zuen etxea eraberritzeko baimena eskatu zion Udalari. Eta Udalak baimena eman zion, "obra udal-ordenantzek agindutakoaren arabera egin dezan eta, komeni bazaio, planoan adierazitakoez gain, etxebizitzari beste solairu bat gehitu diezaion".