Euskal Artzain Txakurren txapelketan Imanol Diaz garaile Loli txakurrarekin

Ermitaren osteko landak izan ziren beste behin artzainen, haien txakurren eta ikusleen topagune. Hamalau bikotek hartu zuten parte Bizkaiko txapelduna erabakitzeko lehian, lurraldeko paraje desberdinetatik etorritako artzain eta euskal arrazako txakurrez osatutakoak:  lau Abadiñotik, hiru Zallatik, bi Gatikatik eta ordezkari bana Etxebarria, Galdames, Gueñes, Orduña eta Orozkotik.

Hogei bat buruz osatutako hiru artalde garraiatu zituzten bertaraino eta honenbeste ariketa eginda aldatu egiten zituzten. Deigarria leku hartan zegoen isiltasuna, ezinbesteko txakurrek ondo entzuteko jabearen berbak. “Segi”, “Etzan”, “Atzera”, “Ezkerrera”, “Eskumara” eta ezer gutxi gehiago esanda, ikusgarria zelan ulertzen zuten elkar.

Galtzeko arrisku bizian dagoen arraza da euskal artzain txakurrarena eta artzaintzarako duen berezko senagatik da estimatua. Txakur ausartak eta era berean orekatuak izaten ohi dira, lagunkoiak oso eta beraien lurraldea zaintze kontuetan apartak.

Mallabira etorritako guztietatik, Loli txakur gorriztak eskuratu zuen txapela, 356 puntu lortuz Imanol Diaz jabearen aginduak zintzo bete ostean. Bizkaiko ordezkari gisa joango da irailaren 19an Axpen ospatuko den Euskal Herriko Artzain Txakurren txapelketara eta berarekin batera han izango dira ere sailkatutako hurrengo hirurak: Mendi txakurra eta Karlos Ardanza, Soli eta Jose Migel Etxebarria eta laugarren geratutako Zuri eta Jose Mari Fernandez.