Urtean zehar gutxitan zabaltzen dute Mendaron Trinitate baseliza, baina, gaur, otsailak 3, San Blas eguna, bertan egin dute elizkizuna. Herritarrak San Blas opilak eta eztarrirako kordelak hartuta joan dira. Zapi zurietan batuta, aluminiozko paperean bilduta edota poltsa handitan sartuta eraman dituzte opilak elizara herritarrek, eta elizkizunaren amaieran, altarearen ertz baten inguruan jarritako Blas santuaren aldamenera inguratu dira, eta hantxe bedeinkatu ditu guztiak Txomin Zabaleta abadeak. Tradizioari aipamena eginez, parrokoak osasuna eta fedea eskatu ditu guztientzat eta bedeinkatutako kordelek eztarriko minak ez ezik, zurrumurruak eta esan txarrak isiltzeko ere balio dezatela eskatu du.
