BARRENAko kazetari eta In Leike kultur elkarteko Ainara Argoitiaren lana da, eta sei lagunen testigantzak jaso ditu bideoan. Plaza auzoan jaio eta hazitakoak dira haietako bost –Silverio Txurruka, Miguel Mendikute, Juanita Iriondo eta Jose Antonio eta Jesus Mari Mendikute anaiak– eta Plaza auzoko Martitenea Txiki baserrira ezkondutakoa da seigarrena –Juanita Ugarteburu (Berriatua, 1940)–. Haien ahotik, mendaroar askorentzat ere ezezaguna den Plaza auzoari buruzko hainbat jakingarri batu ditu kazetariak; besteak beste, autobidea eraiki aurretik Plazan izan ziren enpresen, familia-negozioen, aisialdiguneen, eta etxeak hustera behartu zituzten familien inguruko kontuak. Udaletxeko udalbatza-aretoan izango da proiekzioa, 18:30ean. Bideoak ordubete irauten du.
Argoitiak azaldu du halako helbururik gabe hasi zuela proiektua, Plaza auzora egindako ibilaldi batean auzokoekin bertakoekin egindako solasaldi baten ondotik. Aipatu du sarri joan ohi dela auzo hartara eta Miguel Mendikuterekin eta Jose Antonio Mendikuterekin izandako berbaldi batean sortu zitzaiola zerbait grabatzeko asmoa: "Sekula entzun gabeko kontuak aipatu zizkidaten ortuan lanean ari ziren batean; tartean, 70eko hamarkadan hamasei familia etxerik gabe gelditu zirela Plazan, AP8 autobidea eraikitzeko obrengatik. Hari horri tiraka hasitako proiektua da hau. Kontu haiek guztiak grabatu eta eskola-umeei erakutsi beharko geniekeela aipatu nien, uste dudalako herri-identitatea sendotzeko ezinbestekoa dela zer izan garen eta nor garen ezagutzea; are gehiago, mundura zabalik bizi garen garaiotan. Kontua da nik uste baino gauza gehiago zituztela kontatzeko gure lagunek, eta, ibilian-ibilian, handituz joan dela proiektua, esku artean dugun hau bihurtu arte. Oso eskuzabalak izan dira guztiak, bai nirekin, bai proiektuarekin".