Folklorea ikuspegi queer, komunitario eta aldarrikatzaile batetik berreraikitzeko sortu zuten Maruxak taldea 2019an eta plazaz plaza dabiltza geroztik. Esana dute besteak transformatzeko transformatzen direla eurek, eta maitasun osoz egiten dutela dena, hala sentitzen dutelako. Eta atzo, ikuskizuneko tarte batean ere hala adierazi zuten, aurrez herriko gazte talde batek playback lehiaketan interpretatu zuten kantu baten sortzaile diren Pirritx, Porrotx eta Marimotots pailazoei aipamena eginez. Porrotxen berbak gogora ekarriz esan zuten mundu hobeago, politago eta libreago baten sinisten dutelako dabiltzala oholtzan.