Herriko Enparantzan egin zuten kantaldia Ribera Cantakoek, baina kantaldiaren erdialdera euri zaparrada hasi eta hustu zen plaza. Ez ziren, hala ere, entzulerik gabe gelditu Nafarroatik etorritako abeslari eta musikariak. Izan ere, inguruko etxeen arkupeetatik izan zuten entzuten publiko zabala.
Erraldoien eta buruhandien konpartsakoak ere duda-mudatan ibili ziren arratsaldean: irten bai ala ez, zeruari nahi baino gehiagotan begiratuz. Izan ere, ilun zegoen zerua. Hala ere, apustua egin zuten, eta abiatu ziren kalez kale, Azpilgoetaraino, dultzaineroen ondorik. 19:30 aldera, ordea, euria hasi zuen berriro, eta erretiratu ziren haiek, nahi baino azkarrago. Ordu horretarako, azken prestaketetan ziren Gararock Erramupean ekimenaren sustatzaileak. Azpilgoetako arbolapean zuten musika jartzekoa, baina goizean iragarri zuten Mañuskako etxeen azpira aldatuko zutela lekuz, euriaren beldur. Penatan ziren antolatzaileak, baina asmatu zuten erabakia hartu zutenek. Izan ere, musika jartzen hastekoak ziren orduan hasi zuen euria. Aterpera bilduta eman zuen jendeak iluntzea, garai bateko musika entzunez.
Gauean, danborradaren ostean, Akerbeltz taldearen erromeria izan zuten mendaroarrek. Inguruko herrietatik ere jende dezente bildu zen erromeriara eta plaza bete lagun dantzan jartzea lortu zuten musikariek.