Irailaren hirugarren zapatua Gararock jaialdiak hartua izan du azkeneko urteotan Mendaron, baina aurten ez zela halakorik izango aurreratu zuten antolatzaileek; ez, behintzat, orain arte ohituak geunden moldean. Nolanahi ere, musika izan, izango da garai horretan Mendaron; ez zapatuan, baina bai barikuan, irailaren 18an. Izan ere, hiru kontzertu lotu ditu Gazte Asanbladak egun horretarako, Ateri, Ezta Ilen eta Grapa taldeenak. Gaztetxean izango dira kontzertuak, 21:30ean hasita, nahiz atea 20:30ean zabalduko dutela aurreratu duten antolatzaileek.
Hard-rock doinuak nagusi
Ateri: Aretxabaletako, Bergarako, Arrasateko eta Leintz Gatzagako musikariek osatzen dute Ateri. 2024an sortu zuten taldea, eta hard-rocka eta post-punka egiten dute. Iaz argitaratu zuten beren lehen lana, sei kantukoa: Ilun eta argi. Iluntasun gordinetik argitasun hauskorrerainoko bidaia bezala definitu izan dute taldekideek diskoa.
Ezta Ilen: 2022. urtean Zaldibarren sortutako hirukotea da. Ander San Martin gitarra-joleak, Sergio Devesa bateria-joleak eta Aritz Aranburu Tarran baxu-jole eta abeslariak osatzen dute taldea, hardcore, punk eta rock-and-roll taldeetan aritutakoek. Punk ilun eta post punk musika sortzen dute.
Grapa: 2025ean sortu zen taldea Bergaran hiru bergararrek eta zumaiar batek, eta 90eko hamarkadako punk klasikoa jotzen dute.
