Musulmanendako Eid Al Fitr opariak egiteko sasoia da, hemen Gabonak diren moduan. Eid Al Fitr-eko oparia ipuinean, ama batek hiru ume ditu, baina opari bakarra egiteko dirua.
Pobretasun ekonomikoaren ikuspegitik triste antzean hasten den ipuina, elkar zaintzaren eta maitasunaren erakusle bilakatzen da bere kontakizunean. Eta moraleja ere badakar, horixe dela benetako aberastasuna, maitasuna, eta, ez dirua.
Berbak eta lo-kanta
Ipuin horrexekin hasi zen Munduko Ipuin Ziklo Herritarra, Soukayna Sijilmassi gaztearen eskutik. Ipuina amaitzean, arabierako hainbat berba entzun-ikasi zituzten bertaratutakoek eta umeei loak hartzen laguntzen dien kantutxo bat abestu zuten elkarrekin kontakizuna borobiltzeko.
Munduko Ipuin Ziklo Herritarraren lehen kontakizuna izan zen eguaztenekoa. Aurten, hiru halako izango dira eta hurrengo hitzordua urtarrilaren 27an izango da. André Nunes da Costa-ren eskutik, Brasilgo istorio bat entzuteko aukera izango da.
Zikloa amaitzeko, Saadia Nasirrek Pakistanera eramango ditu entzuleak.