Gaur, astelehena, Komiki Tailerra egin dute Udal Liburutegian. Joseba Larratxe marrazkilariak gidatuta, Soraluze BHI Institutuko lehen mailako ikasleak izan dira partaide. 40 bat ikasle bertaratu dira Udal Liburutegira. Larratxek, berak, Unai Iturriagak eta Harkaitz Canok ondutako Ni ez naiz Mikel Laboa nobela grafikoa erakutsi die eta segidan, komiki bat zelan landu azaldu die. Halaber, lekuan bertan landu du Larratxek adibide bat eta ikasleak zeregin horretan, komikigintzan jarri ditu.
Uxue Agirre liburuzainak esplikatutakoaren arabera, iaz egin zuten lehen aldiz Komiki Tailerra Institutuko gazteei zuzenduta, Komiki Egunaren bueltan. Ekimena ondo joan zela-eta, aurten errepikatu egin dute esperientzia, oraingo honetan, datorren astean ospatuko den Liburuaren Nazioarteko Egunaren bueltan.
