Helduen margo lehiaketari dagokionez, berritasunekin dator. Batetik, "iaz parte-hartzaileekin adostuta", lehiaketako margolanekin egin ohi den erakusketa egunean bertan egingo dute, kalean. Maite Quintanilla Kultura zinegotziak esplikatu duenez, "artistak zaindu eta haiei erraztasunak ematearekin batera, kulturaren kaleko presentzia indartze aldera" erabaki dute hori. Plaza Barrixan izango da –euria bada, elizpean–, 14:00etatik 18:00etara. Bestetik, margolari helduak kanpotik datozela aintzat hartuta, bazkaria eta frontoian aparkalekua egokituko diete.
Helduetan, herritarren saria
Eta, hirugarrenik, erakusketa "indartzeko eta jendea ikustera animatzeko", laugarren sari bat gehitu diote lehiaketari, herritarrena, bozketa bidez erabakitzekoa. Erakusketak iraun bitartean eman ahalko du botoa edozeinek, baita umeek ere. "Denok dugu arteaz iritzia emateko eta gozatzeko gaitasuna", Quintanillaren esanetan. Botoa emateko txartel batzuk egongo dira, datuak bete eta zenbakituta izango diren artelan gustukoenaren zenbakia jarrita bozkatuko da; herritar bakoitzeko boto bat. Erakusketa eta bozketa ikasbidaiakoek zainduko dute. Boto gehien jasotzen duen margolanak, berriz, bertako produktuekin osatutako saskia jasoko du opari.
Gainerako hiru sariei dagokienez, epaimahaiak erabakiko ditu. Epaimahaia osatuko dute Maria Luisa Blasco margolari eta idazleak, Paula Pinilla Krabelin pintura eskolako irakasleak, Laura de Luis Arte Ederretan lizentziadunak eta kontserbazio eta zaharberritzeetan adituak eta Pedro Etxaniz margolari eta eskulturagileak. Lehen saria 600 euro izango dira, bigarrena 400 euro eta hirugarrena 300 euro.
Umeen eta gazteen lehiaketa
Umeen eta gazteen lehiaketari dagokionez, berriz, HHtik DBHrainoko 16 urtez azpikoek parte har dezakete. Plaza Zaharrean –euria bada, SAPAn– banatuko diete materiala, eta kartulinak zigilatu –12:15ean banatuko dute azken materiala–. Dena den, nahi duenak etxetik ere eraman dezake materiala. Maila bakoitzeko sari bana emango dute, Iratxon, Estankoan eta Arcelusen erabiltzeko kultura-bonuak, eta partaide guztiei litxarreriak emango dizkiete.
Sari banaketa ekitaldia, helduena zein umeena, domekan 18:00etan egingo dute, Plaza Barrixan –euria bada, elizpean–.
Topaketa borobiltzeko, zirkua
Margolarien topaketa borobiltzeko, eta iazko "harrera ona" ikusita, zirkua izango da 12:30ean Plaza Zaharrean, Zirika Zirkus konpainiaren eskutik. Umeen lehiaketa bukatu eta berehala egingo dute Marietak Zirkus ikuskizuna, "publiko guztientzat" aproposa.