Plaza Zaharrean barik, gaur, Zubi Nagusian dago nortasun agiriak zein pasaporteak egin edo berritzeko Polizia Nazionalaren unitate mugikorra, DOKII izenekoa. Maiatzeko hitzorduan hainbat gorabehera izan zituzten plazan, eta, pentsatu dute leku aproposagoa izan daitekeela Zubi Nagusia, horrexegatik aldaketa.
Hainbat herritar ezustean harrapatu du leku aldaketak, baina hasi da jendea zubira bertaratzen. Izan ere, maiatzean moduan, ekainean ere, txanda guztiak hartuta dituzte, 48, guztira. DOKII zerbitzuko poliziak esan duenez, behin zerbitzua herrian bertan ematen hasten direnean, erabateko arrakasta izaten du.
Oraingoz, ez dute hurrengo hitzordurik zehaztuta; egiten dutenean, jakinaraziko dute eta zabalduko dute txanda hartzeko epea.