Gaur Donostian hasiko den biltzarra Osasunaren Mundu Erakundeak, IMSERSOk, Eusko Jaurlaritzak, Gipuzkoako Foru Aldundiak eta Donostiako Udalak antolatu dute. Bi egunez, 60 herrialde baino gehiago elkartuko ditu zahartze aktiboaz, irisgarritasunaz eta hiri-diseinu inklusiboaz, zahartze osasuntsuaren sustapenaz… eztabaidatzeko, atzo esplikatu zutenez.
Gaineratutakoaren arabera, pentsiodunen mugimenduak biltzarrean parte hartzea nahiko zukeen arren, “ez Eusko Jaurlaritzak, ez Gipuzkoako Foru Aldundiak, ez Donostiako Udalak ez digute bertaratzeko aukerarik eman”. Horren aurrean, protesta modura, gaur elkarretaratzea egingo dutela iragarri zuten.