Txurrukenen aldaketa handia ekarriko duen obra egiten ari dira asteotan. Uztailaren erdialdean hasi dira obrak eta oro har, aparkalekuak lekuz aldatu, berriak egokitu eta errepidea noranzko bakarrarekin lagako dute.
Asfaltos y Construcciones Morga enpresa ari da obrak egiten. Dagoeneko botata dute espaloiak zuen hormigoizko pretil zuria eta haren harri-hondar gehienak eraman dituzte. Gorka Artetxe obra-buruak jakinarazi duenez, euren asmoa da udako oporretara joan baino lehen esparru hori guztia txukun lagatzea.
Esplikatu duenez, petrilaren lekuan zintarriak (bordilloak) eraikiko dituzte, zehazki errepidetik espaloira bitartean 50 zentimetroko tartea hartuko duten bi zintarri, aurre-fabrikatutako hormigoizkoak. 12 zentimetro altu izango dira zintarriak eta bi zintarrien bitartea hormigoiz beteko dute. Zintarrien helburua da espaloiaren aurrean aparkatuta egongo diren ibilgailuak espaloiraino ailega daitezen galaraztea.
Zintarriez aparte, aldapan dauden aparkalekuak lekuz aldatu eta auzoko etxeen aurreko aldean kokatuko dituzte. Gainera, baterian ipiniko dituzte, orain arte zeudenak baino aparkaleku gehiago egokituz.
Lan horiez aparte, mendi-mazelaren aldean dagoen hormigoizko areka berreraiki egingo dute, eta eremu osoa berriz asfaltatuko dute. Baina horrekin guztiarekin oporren bueltan hasiko direla azaldu du obra-buruak.
Obren aurrekontua da 147.567,41€ BEZ barne.