Datozen egunotan, oraindik itxita segituko du SAPA eta Baltegieta 22 bitarteko errepide zatiak, bertako galtzada-harriak birjartzeko lanak datorren astean bukatuko baititu Echaide enpresak. Emandako xehetasunen arabera, konponketa-lanak datorren astean bukatu arren, gero, ondo sikatu behar da guztia, eta ondorioz, beste hainbat egunez itxita segituko du kaleak.
Orain egiten ari diren konponketa-lanak abuztuaren erdialde inguruan hasi zituzten. Baltegietako garajeen zatitik hasi ziren konpontzen, garajedunei pasoa ahalik eta lasterren emateko. Gero, SAPAren ondoko errepide-zatian hasi ziren lanean eta kale zati horren azken tramuan ari dira egunotan. SAPAren zaharberritutako pabiloia, berriz, aparkaleku bilakatu dute behin-behinerako.
Obran akatsak
Joan den martxoan bukatu zituzten Baltegietan galtzada-harriak birjartzeko obrak, baina kalea zabaldu eta gutxira bistaratu ziren hainbat akats, zenbait galtzada-harri kili-kolo eta kasu batzuetan zuloak ere azaldu ziren. Hala, Soraluzeko Udalak uztailean jakinarazi zuen “behar bezala geratu ez zen eremuan galtzada-harriak jaso eta berriz morteroarekin jarriko” dituztela Echaide enpresako langileek abuztuan.