Txartelak salgai daude Errekalde auzoan zapatuan egingo den herri-bazkarirako. Eros daitezke Iratxo goxo-dendan zein Asigorren. Aurten, menu bereziarekin dator bazkaria: helduentzat paella, okela-bolak, pantxineta eta kafea –17 euro–; eta umeentzat, makarroiak, okela-bolak eta jogurta –12 euro–.
Mesedeetako Jai Batzordetik bazkarira joateko gonbidapena egin diete herritar guztiei, barrixokoei, zein kale-kalekoei: “Kale-kaleko jende asko etortzen da, familia errepikatzaile asko daude. Gurean denak dira ongietorriak”, esan dute.
Puzgarriak, jolasak, futbitoa…
Menu gozoaz aparte, bazkaria borobiltzeko eta familia-giroan ere pasatzeko, umeei begira, zapatura aldatu dituzte orain arte domekan egoten ziren puzgarriak; 11:00etan jarriko dira martxan. Bazkalostean, berriz, umeek Kukumixoren hezitzaileak izango dituzte jolaserako lagun, merendola eta guzti. Eta 17:00etan, 3X3 futbito txapelketa izango dute aukeran; azken hori 2014-2015 eta 2016-2017 urtekoei zuzendutako txapelketa da.
Toka, tutea eta futbolina
Helduagoendako, berriz, eguerdian toka txapelketa izango da, eta bazkalostean, karta-jokoetan, tute txapelketa jokatuko dute eta baita futbolin txapelketa ere. Kasu horietan, parte hartzeko 10 euro ordaindu behar da bikoteko. Sariak honakoak izango dira:
- 1- Birendako bazkaria Edurtzan.
- 2- 60 eurotan baloratutako otarra.
- 3- 40 eurotan baloratutako otarra.
- 4- Txosnan bi trago.
Iluntzea borobiltzeko, zezen-mekanikoan ibiltzeko aukera ere izango da.