Bihar, 10:30ean hasiko da Gipuzkoako Masail Lehiaketa, Arrasateko Musakola auzoko erretiratuen elkartean. Bost bikote iritsi dira sukaldaritza lehiaketako finalera, tartean, baita Debabarreneko ordezkaritza ere. Hain zuzen, Soraluzeko Itxaropena Erretiratuen Elkartean, ekainean jokatu zen masail lehiaketa, eta, hura irabazi zuten Iñaki Iñarrak eta Abel Olaizolak ordezkatuko dute Debabarrena.
Halako lehiaketetan ohi denez, lehiakide-sukaldariak elkartu eta osagai berberak emango dizkiete masail lehiaketa prestatzeko. Bazkalordurako bukatu beharko dute jarduna, epaimahaiak -eskualde bakoitzeko ordezkari banak- bazkalaurretik dastatu behar baititu platerak, gero txapeldunak izendatzeko. Gero, Musakolako elkartean bazkalduko dute elkarrekin lehiaketako partaideek, hango juntakideek eta Agijupens elkarteko ordezkariek, besteak beste.
Hain justu, Agijupens elkarteak, Gipuzkoako Jubilatuen eta Pentsiodunen elkarteak antolatzen du Gipuzkoako Masail Lehiaketa. Aurten 20. edizioa izango du eta emandako xehetasunen arabera, finala herriz herri aldatu egiten dute urtero.