Urriaren 30ean, 14:00etan egingo dute gisatu bazkari preziatua Itxaropena Erretiratuen Elkartean. Urriaren 6an zabalduko dute izen-ematea eta 70 lagunendako lekua gordeko dute, asko jota 90 lagunendako aforua baitago. Bazkaltiarrei lehiaketako sukaldariak eta udal ordezkariak batu behar zaizkiela kontuan hartuta ezarri dute 70 lagunen muga hori.
Eta hain justu, leku horiek bete arte edo bestela, urriaren 27ra arte izango da izen-ematea zabalik. Datorren martitzenean zabalduko dute izen-ematea, urriaren 6an. Itxaropena elkartearen bulegoan eman behar da izena, martitzenetan edo eguenetan, 11:00etatik 12:00etara.
Lehiaketa beteta
Bazkariko protagonista gisatu lehiaketako emaitza izango da, noski. Hura goizean kozinatuko dute, Itxaropenako terrazan jarriko dituzten sutegietan. Eta lehiaketa egiteko gutxieneko zortzi bikoteek dagoeneko eman dute izena.
Lodosarako bigarren autobusa
Bestalde, urriaren 14an Lodosara egingo duten txangorako izen-ematea abiada bizian doa. Zuzendaritzatik kontatu dutenez, joan den astean zabaldu eta hiru ordu laurdenera bete egin zen lehen autobusa, eta bigarrenerako 15 lagunek eman zuten izena. Atzoko izen-emate berriak batuta, dagoeneko 38 lagunek eman du bigarren autobuserako izena. Bihar, eguena, bulegoa zabalik izango da eta orduantxe ere eman ahalko da izena, bigarren autobusean 55 lagunendako lekua baitago.
Urriaren 14an, 09:00etan irtengo dira Soraluzetik Lodosarantz; han Conservas Peron bisitatuko dute, bazkaldu eta gero, Logroñon pasatuko dute arratsaldea. Prezioa da 50 euro.