Aurtengo batzar orokorrean landu zuten 80 urtetik gorakoen omenaldirako izen-ematearen gaia. Kontua da 80 urtetik gorako 235 bazkide dituztela Itxaropena Erretiratuen Elkartean, eta bazkarian, berriz, 83 lagunendako lekua dagoela. Hala, aukera berdintasuna bermatu eta denek joateko aukera izan dezaten, erabaki dute izen-ematean lehentasuna ematea aurreko urtean bazkarian egon ez zirenei.
Bazkaria azaroaren 20an izango da. Egun horretan, 13:00etan itxiko dute Itxaropenako taberna, 13:30ean zabalduko dituzte bazkaritarako ateak eta 14:00etan hasiko da bazkaria.
Ohi denez, bazkalostean egingo diete omenaldia aurtengo bi lagunei. Oraindik ez dute jakinarazi zeintzuk izango diren. Iazko omenduak izan ziren Emilia Altuna (Soraluze, 1929) eta Santiago Garcia (Villanueva de Odra, Burgos, 1933).